Dat Dengen met de Vörsätz

Jedes Mol, wenn e neu Johr op de Matt am stonn es, jonnt de Lütt en sech on fasse ene Hoope von joode Vörsätz. Schlauköpp hannt jeschätzt, dat en ons BRD 22,6 Milljohne Lütt sech bloß 37,4 Milljöhnches Vörsätz för dies Johr vörjenomme hannt.

Ech loss dies Johr de Fenger von de Zijarettches, hät sech dä Schäng-Pitter jesaht. Bloß nimieh eso vill müffele on süffele, wor et Treske-Tatjana am kühme. Ech donn däm Oppa nimieh eso erömkommandeere, hät Omma Finche jemeent. De Pänz verspreche de Mamm, dat se et Kengerzemmer eemol en de Woch akkerat oprüüme wolle. Dä Papp nömmt sech vör, met sinnem Fräuke öfters op Jöck zo jonn on met de Blare nit mieh eröm zo schänge. Op de Chefetasch es dä Baas sech am öwerläje, dat ehm dat Jedoldsfädche nimieh eso flöck rieße soll, wenn ehm so e Tutedöppe op’m Senkel jeht. De Politickers wolle af jetz bloß noch löje, wenn se dobei och rod wehde on et fies nödech es.

Wenn dat em janze Johr so wiederjonn wöhd, hädden mer doch jlatt Zoständ wie em Jahde Ede, sozesare Hemel op de Ähd! Pänz, die freiwellech oprüüme, Politickers, die sare, wat se meene, bloß jesond-schlanke, braw-fromme Lütt ohne e Fitzelke von Laster öm ons eröm?

Joot, dat so Vörsätz lecker kooz send on jrad emol bes am Äng vom Jannewar halde, wenn öwerhaups!