Säsong för Has on Hohn

Nu duurt et nimieh lang: Ostere es vör de Dör am stonn on drop am wahde, dat mr däm Osterhas erinlosse.

Dobei es dä Mömmelmann als lang öm ons eröm am höppe. Beste dörch ons Citty am bummele on en de Schaufinstere am kicke, kannste Minihäskes, Kawenzmannsmömmelmänner on Höhner met on ohne Nest schonn janimieh zälle.

Dann wöhd mr op emol och janz rabbelech on moss op Düwel komm erus – nä, op Has komm erus – de eejene Bud och opbrassele met Osterjedöns. Wenn schonn en de Bäckerbuticke de Mömmelmänner zwesche de Röggelches erömhöppe on em Schohjeschäff de Höhner en de Sandalettches hocke, dann hät mr doch kin Roh, bes mr zo Huus och ene Höhner- odder Hasestall opmake kann.

Mi Hezzblättche, dä Charly-Drickes, säht zwar: Wat soll dä Kwatsch met däm Kitsch? Mer hannt doch schonn e verröckt Hohn em Huus, dat jenöcht.

So e drüch-nöchtern Mannsbeld hät äwe kin Ahnong vom eschte Oster-Ambijänte. Bloß wenn Has on Hohn nit us Jlas odder Terracotta, doför äwer us Marzepan on Schockelad send, dann hätte nix dojäje.