E beske nett

Et jöwt Lütt, die könne dech kahpahfdesch vör de Schnüss sare, wat se meene. Offt deht dech dat äwer janit jefalle, och wenn et fies stemmt. Mr künnt et nemmech jenau eso joot och beske nett sare. Dat heeß also et beske verbräme, ömmäntele, domet et nit eso wieh deht.

För zom Beispell jöwt et ene Hoope Wöhd, öm för uszedröcke, dat eener zovill op de Rebbe hät. Dehste ki Blatt vör de Mull nähme, sähste: Dä Pitter odder et Treske es deck, es fett. Kahpahfdesch, dat hät jesesse! Do künnt mr als Knubbel, Moppelche odder Fetträmmel doch trek Depressjohne kreeje. Lommer doch leewer dat Öwerjewecht e beske nett ömschriewe!

Mer Lütt hee am Rhing send jo doför bekannt, dat mer ons all dat, wat nit jrad schön es, direktemang schön kwassele könne. Woröm also nit och so e paah Pongk, die mr zoevill drop hät?

So fiese Wöhd wie korpelent, deck odder fett kann kinne Pummel verknuse. Dröm sare mer doch leewer e beske nett: vollschlank! Do kammer doch joot met läwe, wenn us de Wespetallje von fröher en Hummeltallje jewohde es odder us däm Wäschbrettbuck ene Ballong. Dat Beste aan däm nette Usdrock es jo, dat dat Wohd schlank dren vörkütt! So kannste noch e beske dat Jeföhl hann, dat de Mannekängfijur nit voll verlore jejange es. E beske nett, dat jeht doch!