Wenn de Mamm am stronze es

Es dat eenzije Kengk von so’n Mamm ene Jong, es on bliewt dä emmer ene Wonderknubbel. Dat fängt als em Sangkkaste aan on höht nie op.
„Mi Schängelche kann met eenem Johr loope wie e Döppke, on janz ohne Pämpers“, verzällt et Schmitze Treske. „Minne Juppemann deht als Radschlare wie ‘ne Alde, on dat met zwei Johr“,  stronzt et Vötz‘ Fiona. „ Minne dreijöhrije Pitter jöwt morje dat eeschte Blöckflötekonzert en de Tonhall“, röpt nu et Primelbecks Pia.

Drissesch Johr drop höht sech dat Trio so aan: „ Minne Schäng brasselt als Prommi-Arschitäckt en Dubai on zeicht denne Muselmännekes, wie mr op Sangk baut. Jede Woch schriewt hä mech ene Breef von fönnef Sidde!“ „Dat es doch janix! Minne Jupp, ene Super-Inschenör, mäkt denne Russkis en Sibirije vör, wie en Öl-Paiplain uszosenn hät. Jede Owend deht hä met mech, sin leewe Mamm, stondelang telefoneere.“

„Jo on? Minne Pitter, mi Liebche“ stronzt nu et Pia, „ es en Nju Jork op de Wall Stroß Moppe-Makler on deht denne Ammis de Penönzkes sorteere. Äwer sin Mamm kann hä dodröwer nit verjesse. Jede Daach litt dä Jong beem Psüschijater op’m Sofa on moss bloß öwer mech verzälle och stondelang! Do sid ehr platt, wat?“

On wie, do fällt eenem nix mieh en!